தனித்தேர்வர்களுக்கு அறிவியல் செய்முறைத் தேர்வுக்கான தேதி அறிவிப்பு!
ஏப்ரல் மாதம் நடைபெறவுள்ள பத்தாம் வகுப்பு பொதுத்தேர்வுக்கு விண்ணப்பித்துள்ள தனித்தேர்வர்களுக்கான அறிவியல் பாடத்திற்கான செய்முறை தேர்வு நடைபெறும் தேதி மற்றும் அதற்கான வழிகாட்டுதல்கள் அறிவிக்கப்பட்டுள்ளன.
இதுகுறித்து அரசு தேர்வுகள் இயக்ககம் (DGE) வெளியிட்டுள்ள அறிக்கையில் கீழ் கண்டவாறு குறிப்பிடப்பட்டுள்ளது:
10ம் வகுப்பு பொது செய்முறைத் தேர்வு!
ஏப்ரல் 2023 பத்தாம் வகுப்பு பொதுத் தேர்வுக்கான அறிவியல் பாட செய்முறைத் தேர்வு (Science Practical Examinations) 20.03.2023 முதல் 24.03.2023 வரை அறிவியல் பாட செய்முறைப் பயிற்சி வகுப்புகள் நடைபெற்ற பள்ளிகளிலேயே நடைபெறவுள்ளது.
தனித்தேர்வர்களுக்கான அறிவிப்பு!
ஏப்ரல் 2023, பத்தாம் வகுப்பு பொதுத் தேர்வெழுத விண்ணப்பித்துள்ள நேரடி தனித்தேர்வர்கள் (new private candidates) மற்றும் ஏற்கனவே அறிவியல் பாட செய்முறைத் தேர்வெழுதி அத்தேர்வில் தேர்ச்சிபெறாத தனித்தேர்வர்கள் (arrears) மேற்படி தேதிகளில் நடைபெறவுள்ள அறிவியல் பாட செய்முறைத் தேர்வில், தவறாமல் கலந்து கொண்டு செய்முறைத் தேர்வெழுதிட அறிவிக்கப்படுகிறார்கள்.
அறிவியல் பாட செய்முறைத் தேர்வு நடைபெறவுள்ள தேதி குறித்து, அறிவியல் செய்முறைப் பயிற்சி பெற்ற பள்ளியிலிருந்து அறிவிப்பு எதும் தங்கள் முகவரிக்கு கிடைக்கப் பெறாதவர்கள், இவ்வறிவிக்கையை தெரிந்துகொண்டு, அறிவியல் பாட செய்முறைத் தேர்வில் தவறாமல் கலந்து கொள்ளும் பொருட்டு. அப்பள்ளியின் தலைமை ஆசிரியர் மற்றும் சம்பந்தப்பட்ட மாவட்டக் கல்வி அலுவலரை அணுகுமாறு தெரிவிக்கப்படுகிறது என்று அறிவிப்பில் கூறப்பட்டுள்ளது.
Comments
Post a Comment